過去一年都真係去咗唔少魚市場乃至漁港旅行順便覓食。憑記憶依次有敦賀（福井）、清水（静岡）、氷見（富山）、閖上（宮城）、銚子（千葉）、一色（愛知）、鳥羽（三重）；嚟緊幾個月仲預定會去焼津（静岡）、田子の浦（静岡）、沼津（静岡）、宮古（岩手）、釜石（岩手）、大船渡（岩手）、気仙沼（宮城）。
靜岡呢個地方，茶就同佢好熟，但水產物真係缺乏知識。知嘅都只係まぐろ、さば、かつお、しらす、さくらえび，乃至伊勢えび係駿河湾嘅魚類。唔同嘅魚種各自大約咩時候係時節，幾時應該好食呢啲基礎知識當然係有。但係，同樣係太平洋側，靜岡同高知同三重同宮崎嘅時節同盛產嘅嘢都微妙唔同。如同相鄰漁港都好，主力買賣嘅魚種都會唔同。
距離去靜岡剩返幾日，有啲唔知食咩好嘅かれん，於是運用大學四年所學。雖然大學唔係讀農林水產關係嘅科目，所學亦無關飲食營養；不過基於司書課程同埋法學部嘅圖書館同Database訓練，於是大概知要點做。如果再認真啲，當然要睇埋氣候水溫水流乃至水質等等factor；然而只係想簡略知道呢個時期去到有咩好食。去到現地同商戶傾計雖然都係方法，但諗落未免太遲，難以做好心理準備。於是乎，各漁港嘅公開資料、各都道府県市町村嘅公式統計，農林水產省、総務省嘅網頁與統計數字，CiNii同AgriKnowlegde嘅論文，加埋レファレンス協同データベース就成為咗我嘅好幫手。
以嚟緊要去嘅静岡為例，主要會路過得到漁港有清水、焼津、沼津同埋田子の浦四個地方。四個地方都圍繞住駿河湾。呢度姑且容我以焼津為例。目前嘅預定係二十一或者二十二號會去。焼津港每年都會有統計報告，統計當年每個月喺嗰度成交嘅魚種別漁獲量同成交額1。換言之講只要望住報告，對照往年嘅天氣，大概就會知道某個時期過去可以食咩好。
然而唔係每個漁港，每個漁業組合都有咁明確嘅數字。就算知道每年大概邊個時期有咩好食，每年嘅天氣都唔一樣，多少都會有啲偏差。譬如話今（二零二四）年二月頭去氷見嘅時候，一般嚟講係寒ぶり最好食嘅時期。然而因為天氣比較溫暖，難得二月嘅氷見都冇積雪；寒ぶり都依然係好食，但聽local講當時最當造嘅已經變成咗春天當造嘅いわし。
雖然，都有雖不中亦不遠嘅參考資料。去之前簡單搵一搵望一望，最少可以避開啲自己唔太中意食嘅魚種，又或者有心理準備食咩會合適，路過見到唔同店家嘅時候都可以從menu揀出比較好食嘅選擇。就好似今年雖然冇緣份品嚐，依家呢個時期嘅新潟県村上市嘅秋鮭真係好合適。